Kasong kriminal ang atubangon sa suspek sa pagpang-hostage sa dies anyos nga batang babaye nga gitawag lamang nga si Inday.
Kini nahitabo pasado alas otso sa gabie niadtong Sabado sa 7/11 Kauswagan highway ning syudad.
Ang suspek mao si Novie Salong, hingkod ang pangidaron, minyo ug adunay duha ka anak sa Mahinog, Camiguin province.
Matud ni City Police Director Senior Supt. Nelson Aganon nga basi sa pamilya ni Salong nga tiggamitan sa illegal nga druga ang suspek hinungdang nabuhat niini ang pagpang-hostage sa biktima.
Nakasinati usab matud pa kini og depresyon human gibiyaan sa iyang asawa aron manarbaho sa gawas sa nasud.
Mahinumdoman, nga mianhi sa Cagayan ang suspek aron mag-exam alang sa lesinsya sa kursong RadTech.
Aduna usab kini uyab-uyab nga taga Barangay Consolacion nga gusto unta niining dalhon sa Camiguin apan wala kini misugot tungod kay aduna usab kini usa ka anak.
Misurender lamang si Salong sa kapulisan human kini nanegosyar sa iyang igsoong babaye nga taga Barangay Balulang nga mao usab ang mihangyo nga ihatag kaniya ang armas ug ang batang gi-hostage.
By: RadyoMaN Ellah Baculio
PC: RadyoMaN Jao Gumapac
