Gina-imbestigaran pa sang Police Station 6 kun anu gid ang motibo sang suspek sa pagluthang sa iya ex-girlfriend kag magulang sini sa Tough Star Engineering Works Gonzaga Extension, Barangay Taculing syudad sang Bacolod mga las 5:45 sang hapon, Hulyo 24.
Sa interview sang DYHB sa hepe sang Police Station 6 nga si Police Captain Elmer Bonilla, na-istorya na nila ang suspek nga si Alvin Lanza sang Brgy. Alangilan, Bacolod City kag may pag-ako ini sa pagpangimon apang ila pa hibaluon kun gin plano gid sini ang pagpatay sa iya ex-girlfriend nga si Aimee Jane Decara kag ang magulang sini nga si Imee Decara Mahilum.
Naguwa man sa ila imbestigasyon nga naka-inom ang suspek sang ginhimo sini ang krimen kag ang armas nga gingamit sini ang wala man sang lisensiya.
Nahibaluan nga matapos ang pagluthang sa duha ka mga biktima, nagtuyo man kuntani ang suspek nga luthangon ang iya kaugalingon apang wala sang bala ang iya armas gani nagpangita ini sang kutsilyo kag ginbuno ang iya kaugalingon sa diin yara siya karun padayon nga ginabulong sa Corazon Locsin Montelibano Memorial Regional Hospital.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
