Kalibo, Aklan— Naguwa eon kaina ro Inquest Resolution kontra kay Rockson Roque residente it Brgy. Mataphao, New Washington Aklan para sa kasong Rape with Homicide sa Aklan Prosecutors Office.
Ginbaton it piskalya ro kaso nga ginpasaka ni PCPL. Raul Reña imbestigador it New Washington PNP ku Sabado nga adlaw apang bangud holiday ku Lunes kabangdanan nga makaron raya nagguwa.
Ginbasehan it kapulisan ro “Last seen Theory” kung sa siin ginbase sa panaysayon it mga witness nga ulihing nakakita nga magkaibahan si alyas Bombay ag ro biktimang si Jennifer Zaulda antes raya makita nga hubeas ag patay eon sa irigasyon.
Daywa ka mga witness ro nagpahayag nga gin-aywanan nanda si Jennifer ag ro suspek ku aga aga it Agusto 22, 2019 samtang sangka eaeaki man ro nakakita sa daywa nga nagapanikangon sa daeanon it alas 3:30 it agahon sa kapareho man nga adlaw pilang oras eamang bago makita ro patay nga eawas it biktima.
Nakumpirma man pina-agi sa Medico Legal Report nga Blunt Force Trauma sa ueo ro kinamatay it babaye ag positibo pa raya nga ginhimuslan.
Nasayuran nga naging balido man ag legal ro ginhimo nga warrantless arrest it mga otoridad sa suspek.
Bangud sangka heinous crime, owa it may gintaeana nga pyansa ro korte para sa temporaryong kahilwayan ni Roque.
Madumduman nga hugot ro pagpamalibad it suspek kung sa siin nagpanindugan raya nga owa it kahilabtanan sa krimen.
Sa makaron nakakulong eon sa Bureau of Jail Management and Penology ro suspek.
#TatakRMN
