Malay, Aklan – Posible magapangatubang it kasong pagbayolar sa Sec. 16 it R.A. 9165 rong sang construction worker matapos nga madiskubre it mga otoridad ro anang tanum nga marijuana sa Sitio Ili, Brgy. Cogon, Malay, Aklan.
Rong suspek nakilaea kay Marcelo Nacino alyas “Toto”, 34-anyos, tubong Libacao, ag presente nga naga istar sa Malay.
Nadiskubre it mga otoridad ro nasambit nga tanum matapos nga rayang si Marcelo it ginreklamo it pagbayolar sa R.A. 9262 ukon pagpanakit ag sa pag follow up it mga kapulisan nakita nga may ana tang tanum nga marijuana sa anda.
Kaina gin operate raya it mga kapulisan sa pagpanguna it Malay PNP, Aklan PDEU ag PDEA-Aklan kung sa siin nakita rong sangka plastic nga taeamnan ag ginatabunan raya it dahon it saging.
Sa sangka plastic nga taeamnan hay makita ro 6 nga puno it marijuana.
Sa pakikipag-angot it RMN DYKR Kalibo kay Nacino nga ro nasambit nga tanum hay gin aywanan kana ni certain “Sam” ag ginapaalagan nga suno sa sugid kana ni Sam raya hay kamatis.
Dugang pa nana nga matapos raya aywan kana it may 6 man eon nga buean hay uwa eon nana raya pag inatuha ay masako imaw sa anang trabaho.
Pero nakita kaina it mga otoridad nga raya hay bag-ong ginbutangan it eapok ro puno ag matsa gin cultivate pa.
Ginpamalibaran man ni Nacino nga uwa imaw kasayod kung ano nga klase it tanum raya ag uwa man imaw nakaagi it pag gamit.
Samtang, suno kay Dir. Cristina Cabatingan, Provincial Director it PDEA-Aklan nga rayang marijuana hay paga daehon pa gid sa syudad it Iloilo para ipaidaeom sa laboratory test ag kon magpositibo hay dayon pagapasakaan it kaso si Nacino.
Sa makaron hay iga kustodiya anay it Malay PNP si Nacino.
