Kalibo, Aklan — Hugot makaron nga igapatuman kung banwa it Kalibo rong terminal to terminal para sa mga nagabyahe nga tricycle sa banwa.
Sa pakikipag-angot it programang Straight-to-the-Point it RMN DYKR Kalibo kay Mary Gay Quimpo-Joel rong head it Traffic Transport Management Unit (TTMU) nga uman nandang iga-implementar rong nasambit nga pagsueondanan sa mga tricycle.
Suno kana nga may una eon kara nga naga eksister nga ordinansa dati pa ag bangud sa ginatawag nga “human consideration” hay ginpahinugutan ro mga tricycle it ibang banwa nga makalibot sa sueod it banwang Kalibo para nga maghatod it andang pasahero ugaling gin abuso man raya.
Sa meeting nga ginpatigayon ko nagtaliwan nga Pebrero 2, nga gin atenderan ro mga representante it LGU-Numancia pinaagi kanday SB Jerome Vega, SB Rogelio Enero Jr., ag Mr. Bernard Gonzales ko office of the mayor ag mga representante man halin sa LGU-Kalibo sa pagpanguna ni Mayor William Lachica hay anda kara nga gin istoryahan ag ginkasugtanan verbal nga i-implement ro terminal to terminal scheme.
Ro mga Kalibo franchise holder hay pwede makaadto, makahatod ag maka pick-up sa banwa it Numancia kung rong karga it pasahero hay mga bolto-bolto nga goods.
Kamana man ro mga naga adto sa Lezo ukon Makato hay pwede makaagi sa national highway nga sakop it banwang Numancia, pero paga parahan raya it mga MAP ag usisaon it mayad kung siin gaadto kaman man ro sakay kon may una para masayran kon siin gaadto.
Samtang ro mga tricyle halin sa banwa it Numancia hay pwede man nga makaagi sa banwang Kalibo kon may gina adtunan nga ibang banwa pero sa national highway eamang pwede mag-agi ay kon sa ibang karsada sanda umagi hay maga bayolar sanda it ginatawag nga “out of route” ag pagadakpon.
Sa pihak nga parte paga-ayuson eon man ro parkingan it mga tricycle nga halin sa eastern side kung matambakan eon ag mabutangan it pila ka mga structure rong lugar nga ginbakae it LGU-Kalibo para himuon nga terminal partikular sa may San Lorenzo Drive, Andagao, Kalibo, Aklan.
