Tiyo nga nagbuno buno sa iya hinablos nagagamit sang druga

BACOLOD CITY – Gin-ako sang bayaw sang suspek nga nagbuno buno patay sa iya hinablos may mga las 12 kaina sang tungang gab-i sa Purok Sigay, Magsungay, Brgy. Singcang Airport, Bacolod City nga naga gamit gid man sang illegal nga druga ang suspek.

Nahibaluan nga patay sa amo nga insidente ang biktima nga si Ren “Nonoy” Antonio, 6 anyos ang edad kag naga-istar sa amo nga lugar upod sa iya tiyo nga suspek, samtang ang suspek naman amo si Arnel “Nene” Antonio, 32 anyos ang edad.

Suno kay Rommel Salgado, bayaw ni Nene nga mabuot kuntani ang suspek bangud wala ini naga-inom galing lang kay ini ang may bisyo nga illegal nga druga.


Ang biktima kag ang iya utod ang naga-istar upod sa ila tiyo nga suspek sa amo nga lugar.

Pahayag ni Salgado nga antes natabo ang krimen, nagkadto pa sa ila balay ang suspek kag ang biktima agud maglantaw sang telebisyon.

PIla ka oras matapos nga ini sila ang nagpauli, may nabatian na lamang ang tiya sang biktima nga ini ang nagasinggit nga “aguy to.”

Bangud sini, gilayon nga ginkadtuan sang tiya ang balay sang hinablos kag didto iya nakita ang duguon nga lawas sang biktima matapos nag-angkon sang 21 tanan ka igo sang buno, 3 diri ang patal nga igo sa dughan.

Sang ginpamangkot ang suspek, iya sini ginsiling nga nagdamgo siya nga may ginabuno ini apang sa iya pagbugtaw didto kag iya nakita nga ang iya gali hinablos amo na ang iya nabuno.

Gilayon nga nagpalagyo ang suspek apang ini siya ang nadakpan man pasado las 3 kaina sang kaagahon sa Purok Uno, Magsungay.

Wala sa ila balay ang ginikanan sang biktima sang natabo ang insidente bangud ang iya iloy yara sa Manila samtang yara naman sa Cebu ang iya amay.

Nahibaluan nga ang suspek may 3 ka mga kabataan, bulag sa asawa kag ginaalegar naga druga man ang amo nga babayi./dyHB BACOLOD

Facebook Comments