Davao City – Plano karon sa Philippine National Police Regional Office (PRO-XI) nga mag mugna ug mag-deploy og ‘Tourist Police’ sa Island Garden City of Samal (IGaCoS).
Una nang nihangyo ang IGaCoS LGU og dugang pwersa sa kapulisan aron hingpit pagseguro sa kaluwasan sa mga residente sa maong prime island destination sa Davao Region ilabi na sa gilaumang pagdagsa sa mga turista sa maong isla.
Matud ni PRO-XI Regional Director Police Brigadier General Filmore Escobal, gi-activate na sa regional police command ang Tourist Police sa isla sa Samal apan anaa pa kini sa interim status gani, gi-refer pa kini niya ngadto sa PNP National Headquarters sa Camp Crame aron matuki sa mga kadagkuan sa nasudnong kapulisan.
Dugang ni Escobal nga giproseso na nila ang pag-file sa gikinahanglang ihap sa mga personahe aron makumpleto na ang bag-ong yunit nga ipailawom sa PNP provincial setup.
Gilauman nga mamahimong fully operational and activated na ang maong special security unit una pa man matapos ang 2019.
Langkuban kini sa usa ka platoon kun 39 ka mga personahe kansang composition magdepende sa gihapon sa final approval sa National Police Commission (NAPOLCOM).
RadyoMaN Jason Amisola
