Davao City – Gitabangan og kulata sa usa ka grupo sa mga batan-on ang usa ka tricycle driver ingon man gibanhigan usab og bato ang iyang tricycle hinungdan nga nangabuak ang samin niini nahitabo sa Brgy. Mintal ning syudad sa Davao.
Complainant naila nga si Julito Regado, hamtong ang pangidaron, residente sa nahisgutan nga lugar.
Base sa report, bandang alas-3:00 kaganinang kaadlawon samtang nag biyahe ang complainant nakita niini iyang ig-agaw nga si alyas Nene, 18 anyos, kinsa wala nay panimoot tungod sa tumang kahubog sa usa ka imnanan atbang sa sabongan sa Brgy. Mintal.
Gi-alirongan na matud pa iyang ig-agaw nga babayi ug gipanamastamasan na sa grupo sa kalalakin diin naila ang usa niini nga si alyas Dongki kinsa taga-Doldol Brgy. Tacunan Tugbok ning siyudad.
Gibadlong sa complainant ang maong grupo dayon gisakay ang ig-agaw nga babaye sa iyang sidecar apan atol sa iyang pagpadagan gi-atangan kini sa mga respondent dayon gisumbag iyang nawong ug gibunalan ang mga samin sa iyang sidecar hinungdan sa pagka damage niini.
Daling misibat ang mga suspetsado gani una niyang gihatod iyang ig-agaw sa ilang panimalay dayon nagpatabang sa kapolisan sa Tugbok.
Samtang nagpadayon ang imbestigasyon karon sa kapulisan aron maila ingon man masikop ang mga suspetsado.
RadyoMaN Paul Canono
