Davao City – Subling gipalanog sa mga lumad ang ilang hiniusang panawagan nga sirad-an na sa hingpit ang tulonghaan sa Salugpungan nga nahimutang sa Sitio Nasilaban uban sa pagkundina sa presinsiya sa teroristang CPP-NPA-NDF sa ilang lungsod.
Alayon ani, ang Tribal Council nagpasar og duha ka resolusyon nga gipirmahan sa mga elders sa tribu aron ikundena ang mga komunista ug lakip na ang Salugpongan kansang ang mga batang lumad gitudloan matud pa nga musangag sa gobyerno.
Gihimo ang pagpagawas sa duha ka resolusyon atol sa ikaduhang regular session sa Sangguniang Bayan sa lungsod sa Talaingod nga gipamunuan ni Vice Mayor Michael Manos.
Ang unang resolusyon nga gipagula niadtong Nobyembre 15 sa nakalabay’ng tuig nagtumong sa pagdili sa mga Non-Governmental Organization nga iya sa teroristang CPP-NPA-NDF nga makasulod sa mga komunidad sa mga lumad sa naasoy nga lungsod.
Gibasol sa tribal council ang NPA sa hinay nga kalamboan sa ilang dapit tungod daghan sa mga investors nagduhaduha og lagak sa ilang mga puhonan gumikan sa kabalaka nga basin pangilkilan sila o dili ba kaha sabotahion ang ilang operasyon pinaagi sa pagsunog sa ilang mga propiyedad.
Gawas niini, ang padayon nga exploitation ug pagpangrekrut sa hut-ong sa mga lumad ug sa mga batan-on aron musampa sa kalihukan maingon ang paglapas sa tawhanong katungod ug sa yutang kabilin ang nagtukmod aron hingpit palayason ang CPP-NPA-NDF ug sa mga kaalyadong organisasyon sa ilang dapit.
RadyoMaN Joel Viray
