*USA KA PAMILYA-NAHILO SA OHONG*
General Santos City—pulos nadala sa ospital ang lima ka miyembro sa pamilya nga taga Purok 10, Barangay Katangawan, ning syudad human nga nahilo sa gikaon nga Ohong (Mushroom).
Mga biktima nailhang silang si Arnel Obas, 41, Casandra Obas, 1yr old, Gemma Reponte, 53, Jenny Reponte, 24 ug Jenny Rose Reponte, 17, pulos residenti sa samang barangay.
Subay sa pahayag ni Arnel Obas nga ang ohong ilang gikuha duol sa ilang panimalay dayon ilang giluto alas 6:00 ang takna sa hapon, Miyerkules, June 21, 2017, pagka alas 8:00 sa gabie ila kining gikaon apan human sa 2 ka oras nakasinati nalang sila ug panakit sa ilang tiyan ug pag suka-suka.
Tungod dili na maagwanta, nagpatabang ang mga nahisgutan sa ilang mga silingan aron sila madala sa balay tambalanan.
Dugang pa ni Obas nga wala silay laing gidudahan sa hinungdan sa pagpanakit sa iyang tiyan ug pag suka suka kon dili ang Ohong nga ilang gisudlan sa panihapon tungod sumala pa wala naman silay laing nakaon nga pagkaon ayha nahitabo ang insidenti.
Sa kasamtangan ang mga biktima luwas na sa kuyaw nga kahimtang ug gikatakda nang makagawas sa ospital.
