𝐌𝐀𝐘𝐎𝐑 𝐁𝐔𝐋𝐋𝐄𝐓 𝐍𝐀𝐍𝐆𝐇𝐀𝐓𝐀𝐆 𝐎𝐆 𝐎𝐏𝐕 𝐖𝐇𝐈𝐓𝐄 𝐂𝐎𝐑𝐍 𝐒𝐄𝐄𝐃𝐒

Malipayong gitunol ni Mayor Seth Frederick P. Jalosjos ngadto sa 100 ka mga miyembro sa Dapitan City Agriculture and Fishery Council (CAFC) ang tagsa ka sako nga Open Pollinated Variety (OPV) sa white corn seeds kagahapong adlawa, Septyembre 7 diha sa City Agriculture Compound sakop sa Barangay Banonong ning dakbayan.
Nasayran gikan sa buhatan ni City Agriculturist Cyril Patangan nga adunay sulod nga 20 ka kilo ang matag sako sa maong binhi sa mais, diin mahimong matanom sa usa ka ektarya nga yuta.
Isip usa ka mag-uuma, gituhoan ni Mayor Bullet nga ang Mindanao maoy “food basket” sa Pilipinas ug ang agrikultura maoy numero unong nagmaneho sa ekonomiya ug naghatag og pinakadakong pondo sa nasud.
Nanghinaut ang mayor nga padayong suportahan sa Department of Agricuture (DA) ang kagamhanang lokal sa Dapitan aron mas daghan pang mga miyembro sa nagkalain-laing farmer association sa dakbayan ang matabangan alang sa kalamboan sa ilang panginabuhian.
Dugang ni Mayor Bullet, 100 porsyento ang ayuda nga ihatag sa kagamhanang lokal ngadto sa mga mag-uuma. Gani matud pa niya, adunay pagahimuon sa Dapitan (Pulauan) Port nga corn silo, diin usa ka istruktura alang sa pagtipig sa mga mais nga ikabaligya ngadto sa probinsya sa Batangas para himuong pagkaon sa mga hayop.
Gianunsyo usab ni Konsehal Ronie M. Jarapan, ang Chairman sa Committee on Agriculture, nga kasamtangan siyang nagpanday og ordinansa nga maghatag ug proteksyon sa mga mag-uuma ning dakbayan
Facebook Comments