CAUAYAN CITY- Isinuko sa Land Transportation Franchising and Regulatory Board (LTFRB) Region 2 ang mga plaka ng mga pampasaherong jeep na sangkot umano sa insidente ng street racing sa Naguilian, Isabela.
Ang pagsuko ng mga plaka ay isinagawa sa pagdinig na pinangunahan ni LTFRB Region 2 Regional Director Atty. Richard G. Dayag bilang bahagi ng pagpapatupad ng suspension order at Show Cause Order na inilabas laban sa mga sangkot na pampasaherong sasakyan.
Ayon sa LTFRB, ang hakbang ay alinsunod sa direktiba ni Pangulong Ferdinand “Bongbong” R. Marcos Jr. na tiyakin ang kaligtasan at kapakanan ng publiko, gayundin sa ilalim ng gabay ng Department of Transportation (DOTr) at ng pamunuan ng LTFRB.
Patuloy namang pinaaalalahanan ng LTFRB ang lahat ng public utility vehicle operators at drivers na mahigpit na sumunod sa mga batas trapiko at umiiral na regulasyon upang matiyak ang kaligtasan ng mga pasahero at iba pang gumagamit ng kalsada.
Nagpapatuloy ang imbestigasyon ng LTFRB kaugnay ng naturang insidente at inaasahang magpapasya ang ahensya batay sa resulta ng isinagawang pagdinig at iba pang ebidensiyang nakalap.
