12 ka mga lungsod sa Zamboanga del Sur, gikonsiderang priority areas sa DOH alang sa Booster Campaign

16
Pagadian City – Gikonsiderang priority areas sa Department of Health ang 12 ka mga lungsod sa Zamboanga del Sur alang sa gipahigayong “PinasLakas Booster Campaing” sa unang 100 ka adlaw sa pagdumala ni Presidente Ferdinand Marcos Jr.
Gipahibalo sa Integrated Provincial Health Office atol sa stakeholders meeting ang naasoy nga mga munisipalidad nga gilangkuban sa Dumingag, Tambulig, Midsalip, Aurora, Tukuran ug Dimataling alang sa A2 kun Senior Citizens Vaccination samtang ang mga lungsod sa Aurora, Dumingag, Molave, Mahayag, Tukuran, Tambulig, Dinas, Labangan, Margosatubig ug Midsalip ang prayoridad sa 1st dose booster shot alang sa general population.
Sumala ni Health education and promotions officer Dahlia Aseniero, tumong sa PinasLakas Covid Vaccination campaign nga makab-ot ang 90% vaccinated A2 population maingon man ang 50% nga makadawat og booster shots sa eligible population.
Molungtad ang maong vaccination campaign gikan Agosto 1 hangtod Septembre 30 ning tuiga diin target sa probinsya nga mabakunahan ang 21,176 nga senior citizens ug 216,723 ang makadawat sa booster dose sulod sa 60 ka adlaw.
Giawhag karon sa buhatan sa panglawas ang kooperasyon sa mga ahensya sa gobyerno ug uban pang stakeholders sa pagpalapnag sa mga kasayuran ug impormasyon labot sa benepisyo sa booster shots aron makab-ot ang gitinguhang strong wall of immunity sa nasud batok sa COVID-19.

Facebook Comments