17-anyos nga naghimo sa “DavaoGo” app, gipasidunggan sa Davao City Council

Davao City – Gidayeg ug gihatagan og pag-ila sa Davao City Council si Francisco Navalta, 17-anyos nga Grade 12 student sa Assumption College of Davao, tungod sa iyang teknikal nga talento ug paghimo sa DavaoGo, usa ka mobile application nga makatabang sa mga commuter sa Davao City atol sa ika-43 nga regular session sa Sangguniang Panlungsod, Oktubre 27, 2026.
‎

‎Matud pa ni Konsehal Bonz Andre Militar, chairperson sa Committee on Information Technology, atol sa iyang priveleged speech, nga pinaagi sa DavaoGo, dali nang makita sa mga pasahero ang mga ruta sa jeepney ug bus, pamasahe ug mga nag-unang agianan. Libre usab kining ma-download sa mga android phones ug adunay built-in nga tabang nga makatubag sa mga pangutana sa Bisaya, Tagalog ug English.
‎

‎Tungod niini, nagpasa ug usa ka resolusyon ang konsehal aron pasidunggan si Navalta tungod sa dakong kontribusyon niini sa Davao City.
‎

‎Gidayeg sab sa konsehal ang inisyatiba ni Navalta sa paggamit sa teknolohiya aron makatabang sa mga Dabawenyo, ilabi na sa paghatag og mas sayon nga access sa impormasyon bahin sa pampublikong transportasyon.

RadyoMaN Wil Duran