Davao City – Natunulan og citation ticket ang 19 ka indibidwal tungod sa paglapas sa Liquor Ban Ordinance sa Davao City atol sa operasyon sa Vices Regulation Unit (VRU), Mayo 27, 2026.
Base sa report, 11 ka mga tawo ang naaktuhan nga nag-inom sulod sa usa ka bar sa Barangay Obrero bisan pa sa gipatuman nga liquor ban. Gitiketan usab ang maong establisemento tungod sa pagsupak sa ordinansa sa siyudad.
Samtang, laing walo ka mga indibidwal usab ang nadakpan nga nag-inom sa kilid sa dalan ug sa pampublikong mga lugar nga hugot nga ginadili ubos sa Liquor Code Ordinance sa Davao City.
Padayon ang panawagan sa VRU ngadto sa publiko nga sundon ang mga ordinansa aron malikayan ang silot ug masiguro ang kalinaw ug kahapsay sa komunidad.
RadyoMaN Kareen Beltran
Facebook Comments
