Dos maga menor de edad mojer reprtaoment ya queda victima de “gang-rape” desde na mano del seis maga persona nabarrio de Pasobolong. El dos maga victima abos el edad de 14 anio, residente de Boalan ya sale na diila cada-y-cual casa de Nobyembre 18 hablando que anda sila visita con el diila amiga na Pasobolong. Pero hasta alamaniana nohay estos puede bolbe casa rason para con el diila maga mayores para reporta na estacion de pulisia el diila aucencia. Del Miyercoles ya bolbe el dos dalaguita na diila casa y ya reporta con el diila mayores que canila ya abducta el seis persona y lleva na uncasa na Muslim Village atras del Mindanao Central Sanitarium donde canila ya presa y yan porsa sexualmente por muchas vezes. El asunto ya lleva na atencion del pulisia na Culianan. Durante el imbestigacion, el dos victima ya relata con el maga pulis hablando que del pecha 19 deste mes pabolbida ya sila caminando y pasando serca na by-pass road cuando tiene alegaomente seis persona muntao na maga motorsiclo el ya abducta canila y ya lleva na un casa na Muslim Village, donde canila ya presa y ya man pintacase man rape. Pero del Miyercoles ya puede sila escapa y ya bolbe na diila casa. Ayer aga ya conduci follow-up operation y ya resulta na aresto del dos suspechao na Pasobolong. Noquierre pa el pulis revela el maga nombre del dos arestao suspechao.
