Sa Koronadal City; Patay na sang masapwan ang isa ka laborer matapos nga naghikog gamit ang naylon twine looped sa bahin sang Prk. Balnabo, Brgy. San Roque, Koronadal City kahapon nga adlaw, Hulyo 5, 2020.
Ginkilala ang nasambit nga persona kay Charlie Siason Melote, 44-anyos, single kag residente sang nasambit nga lugar.
Base sa imbestigasyon nga nasapwan na lamang ni Gina Malayon ang utod nga nagabitay alas 3:30 kahapon nga adlaw. Gilayon naman nga gindala sa South Cotabato Provincial Hospital ang nasambit nga persona, apang gindeklarar ini nga dead on arrival sang attending physician.
Sa Norala, Nakabaton sang report alas 10:20 sang gab-i sang Hulyo 5, 2020 ang Norala Municipal Police Station halin sa Norala District Hospital nga may-yara sang 19-anyos nga biktima sang suicide incident sa nasambit nga ospital.
Sa imbestigasyon sang Norala MPS kag base naman sa pahayag sang biktima nga emotionally depressed suno pa siya tungod ginbasol siya sang iya mga abyan kon ngaa napierdi ini sa drag race sang motorsiklo matapos nga siya ang facilitator sang nasambit nga race.
Apang alas 10:10 sang gab-i sa amo nga adlaw nakit-an na lamang sang iya nga pakaisa nga ginabuno sini ang kaugalingon gamit ang stainless knife.
Nakaangkon naman sang pilas sa tuo nga bahin sang iya tyan ang biktima kag gilayon nga gindala sa Norala District Hospital kag ginforward sa South Cotabato Provincial Hospital para sa dugang nga medikasyon.
