2 suspek sa pagpatay dakpan sa hot pursuit operation

Davao City – Nadakpan sa kapulisan sa Maa, ang duha ka mga suspek nga giila nga sila si Danny Boy Tumagsa Suminggil, 22 anyos, laborer, residente sa Kapatagan, Brgy. Guipitan, Kapalong, Davao del Norte ug Bryan Mangnatan Acero, 23 anyos, minyo ug lumulupyo sa Purok 10, Canangaan Kabanglasan, Bukidnon nga adunay kasong pagpatay kang Eloide Paulino.

Sumala sa report sa Maa Police Station, niadtong March 12, 2023 sa gabii nahitabo ang krimen ug sa sayong kabuntagon nakit-an ang patay’ng lawas ni Eloide sa usa ka junkshop sa Purok 4, Kauswagan, Brgy. Langub, syudad sa Davao.

Sa pagsubay sa CCTV footage camera sa maong establisemento, nailhan ang mga suspek.

Sa gihimong imbestigasyon sa intel operatives sa Maa Police Station sa panguna ni PCPT Roger Moreno ubos sa supervision PMaj Ma. Teresita Plaza Gazpan, nasayran nga nanguli ang duruha sa probinsya sa Kapalong.

Gilayong ni-coordinate ang operatiba sa Maa Police Station sa Kapalong Municipal Police Station sa pagpanguna ni PMaj Raul Lucas ug nagmalampuson ang gihimo ang hot pursuit operation sa mga awtoridad ug nadakpan ang duha ka mga suspetsado niadtong Lunes, March 13, 2023.

Narekober usab ang single nga motorsiklo nga gipanag-iyahan sa biktima nga posibleng maoy gigamit aron makasibat human sa gihimong krimen.

Sa pagkakaron, anaa na sa kustodiya sa kapolisan sa Maa ang mga suspetsado aron kasohan og murder.

RadyoMaN Paul Canono