Lider ug duha ka miyembro sa iladong Acuman Criminal Group sa Northern Mindanao, mitahan sa kapulisan

Boluntaryong mitahan sa kapulisan sa rehiyon ang giilang lider ug duha ka miyembro sa iladong grupo sa Akoman Criminal Group sa Northern Mindanao adtong Lunes didto sa Sitio Tiwaloan, Barangay Dominorog, Talakag, Bukidnon.

Sa interview sa RMN Malaybalay ngadto kang PMaj. Joan Navarro, Regional Spokesperson sa Police Regional Office (PRO)-10, gibutyag niya nga boluntaryong mitahan silang Dario, Erwin, ug Ryan Akoman uban sa pagturn-over sa usa ka M16 ug M14 rifle, lakip ang mga magazines ug bala niini, ug usa ka kalibre 45 nga pistola.

Nahimo ang maong pagtahan gumikan sa tabang sa mga barangay officials ug tribal leaders sa maong lugar.

Ang Akoman Criminal Group responsable sumala pa ni Maj. Navarro sa mga dagkong krimen nga gakahitabo ilabi na sa rehiyon-X.

Bisan paman gakahinay na ilang pwersa, dili matud pa kinahanglan basta-bastahon ang maong grupo tungod kay organized sila ug mamahimo gihapong makaoperar ug makahatag hulga sa kahusay ug kalinaw sa Rehiyon-X.

Dugang pa ni Maj. Navarro, nga usa usab sa ilang ginabantayan mao ang nagsingabot nga barangay ug SK Elections tungod kay posible nga rombohon kini sa maong criminal group, apan gibutyag usab niya nga wala pa silay nakuha nga impormasyon nga nahimong private armed group ang maong hugpo apan dili gihapon walaon ang posibilidad nga mahitabo kini.

Facebook Comments