Davao City – Magdugang karon ang City Transport and Traffic Management Office (CTTMO) og dugang 250 personnel subay sa mando kanila ni Davao City Mayor Inday Sara Duterte-Carpio.
Kini maoy gibutyag ni CTTMO office-in-charge Ret. Chief Supt. Dionisio Abude sa gipahigayong iSpeak forum karong adlawa sulod sa City Hall, diin siya miingon nga nagsugod na kagahapong adlawa, Marso 7, ang processing sa mga aplikante gani ginasusi nila pag-ayo kung kinsa ang mga kwalipikado.
Kinahanglan highschool graduate, adunay good moral certification gikan sa barangay ug police clearance, diploma o Transcript of Records sa mga college graduates ug ang mandatory drug testing.
“They will undergo two weeks training , aron makahibalo sila unsa kining atong traffic code, traffic signals and regulations,” segun ni Abude.
Sumala sa hepe sa CTTMO, adunay na-identify nga 96 ka mga intersections dinhi sa dakbayan nga walay personahe sama sa Bankerohan ug San Pedro Streets.
“Additional justification nato kay wala pa nato mausab atong kultura nga kung walay personahe dili ta motuman pero pag naa diha lang motuman,” dugang ni Abude.
Kasamtangang adunay 446 ka mga personahe ang CTTMO.
Sa pikas bahin, mokabat sa 250 usab ka mga personahe sa CTTMO ang gi-deploy alang sa ipahigayong Parada Dabawenyo karong Marso 16, 2018 subay sa selebrasyon sa Araw ng Dabaw.
Anaa usab ang presensya sa Task Force Davao (TFD), Davao City Police Office (DCPO) ug highway patrol group.
Gawas niini, adunay ipatuman nga Traffic Community Network (TRAFCON) kinsa mga standby nga personahe pananglitan kung nanginahanglan og dugang pwersa ang CTTMO.
RadyoMaN Jason Amisola
