Gitingkagul na karon sa prisuhan ang 35-anyos nga lalaking suspek human nadakpan sa gilusad nga drug buy-bust operation sa mga kapulisan pasado alas 12:10 sa kadlawon kagahapon didto sa Purok-1, Barangay Poblacion, Malitbog, Bukidnon.
Giila ang suspek nga si Ricarte Janio, 35 anyos, ulitawo, ug residente sa Sitio Tinubali, Barangay Sta. Ines, Malitbog, Bukidnon.
Narekober gikan sa suspek ang lima ka mga pakete sa gituohang drogang shabu nga mukantidad og P2,040.00 ug gibana-banang mutimbang og 0.30 gramos, lakip na ang usa ka P500 bill, usa ka lighter, usa ka unit sa Oppo nga cellphone, ug usa ka unit sa Honda beat nga single motor.
Giturn-over ang mga nakompiskang droga ngadto sa PNP Regional Forensic Unit 10 sa Camp Evangelista, Patag, Cagayan De Oro City alang sa dugang imbestigasyon.
Ginaandam ang kasong paglapas sa RA 9165 kon Comprehensive Dangerous Drugs Act of 2002 batok sa suspetsado.
Facebook Comments
