66 anyos nga lalaki gikulata sa igsoon, patay

Davao City – Kasong homicide ang atubangon sa usa ka lalaki human niini napatay ang iyahang mismong igsoon, nahitabo sa Purok 5, Pag-asa, Barangay Guadalupe, Carmen, Davao del Norte alas 12:30 sa udto niadtong Martes, Marso 14, 2023.

Sa report sa Carmen Municipal Police Station (MPS), ang biktima nailang si Florencio Molinos Seraje, alyas “Moroy”, 66 anyos. Samtang, ang suspek mao ang igsoon niini nga si Alberto Molinos Seraje, alyas “Bitong”, 70 anyos, pulos mga residente sa nahisgutang lugar.

Sa inisyal nga imbestigasyon, samtang nag-inom ang biktima uban ang iyahang higala, nagkalalis kini sa iyahang magulang nga miresulta sa pagsumbag kaniya.

Natumba ang biktima ug wala pa nakuntento ang iyahang igsoon, gisipa-sipa kini sa makadaghang higayon ug naigo sa iyahang nawong ug li-og nga maoy hinungdan sa iyahang hinanaling kamatayon.

Gilayon usab nga mitahan ang suspek sa awtoridad nga gibalhog na karon sa Carmen MPS.

RadyoMaN Kirby Manzon

Facebook Comments