Davao City – Sa tan-aw sa usa ka iladong abogado sa siyudad sa Dabaw, walay angay ikabalaka ug ikahadlok ang mga Pilipino sa pagmontar og super electromagnetic railgun ug pagpalupad sa Chang’e-4 moon mission spacecraft sa China ning bag-ohay lamang.
Matud ni Atty. Leonard Cagatin, normal lamang ang gibuhat sa China diha sa pagpakita sa modernong mga armas ug ang pagpalupad og spacecraft didto sa bulan sanglit ang ubang kanasuran mao man usab ang ginahimo busa papason na sa mga Pilipino ang kahadlok tungod sa agresibong paglihuk sa higante ug gamhanang nasud sa Asia-Pacific region.
Dugang ni Cagatin walay igong rason nga kita magbaton og kalisang nga hingpit kontrolahon sa China ang kadagatan ug ekonomiya sa tibuok kalibutan maong walay hunong ang maong nasud sa pag-modernisa sa ilang military capabilities.
Hangtud dili mugamit og armas ug manulong ang China sa ubang kanasuran, nagtoo si Cagatin nga imposibleng hulga ang nasangpit nga nasud ngadto sa ubang mga kanasuran.
Gipasabot pa ni Cagatin nga dili basta-bastang maka-deklara og giyera ang China batok sa ubang kanasuran nga buot nilang gawngan gumikan adunay United Nations (UN) nga magsita unya kanila kung muhimo sila og dinautan nga lakang kontra sa ubang kanasuran nga ilang makursunodahan.
Mas labaw nang babag sa China ang paglusad og giyera kay nakasalalay sa ubang kanasuran alang sa padayon nga paglambo sa ekonomiya ug mao kining butanga ang dili kaya isugal sa maong nasud sanglit ang unang maangol mao ang mga Intsik nga mawad-an unya og trabaho.
Dakung epekto sa mga kumpanya nga nakabase sa China ang ilang ekonomiya ug kaugmaon sanglit ang ilang panginabuhi nagdepende sa pang-kalibutang merkado diin dili lamang ang Intsik ang consumers sa ilang mga produkto apan ang pinakadakung bahin sa ilang merkado mao ang daghang kanasuran sa tibuok kalibutan.
RadyoMaN Joel Viray
