Anak natigbasan sa kaugalingong amahan, suspek nasayran nga hubog

31
Lapuyan, Zamboanga del Sur – Duha ka kaso ang posible nga atubangon sa amahan nga niunay pagtigbas sa iyang kagalingong anak human kini niya gipugos og payarok sa duha ka baso nga tuba didto sa Barangay Mahalingeb, sakop sa lungsod sa Lapuyan niining probinsya sa Zamboanga del Sur alas 10:00 kagahapon sa gabii April 5, 2022.
Sa prisohan na nahuwasan ang suspek nga nakalimogmug og tuba nga si Enoh Mahasimpit Sr. samtang nagpa-alim usab sa samad tinigbasan sa agtang ang biktima nga itago lang sa ngalan nga Garry.
Sa inisyal nga imbestigasyon sa Lapuyan PNP, nag-inusara matud pa nga nagtungab-tungab og tuba ang suspek ug dihang nahubog na gipugos niini pagpayarok ang iyang anak sa makaduha nga higayon ug dayong kuha sa iyang sundang dungan ang paghagit og away.
Dihang giwara-wara sa suspek ang sundang aksidente nga natapsingan ang agtang sa biktima rason nga nangayo kini og pakitabang sa mga silingan ug opesyal sa barangay.
Malampuson usab nga nadakpan ang suspek nga gikustodiya na karon sa Lapuyan MPS ug ang anak nga biktima gidala sa Lapuyan Rural Health Center alang sa medikasyon.
Kasong paglapas sa RA 9262 Anti-Violence Against Women and Their Children Act of 2004 ug Attemped Hommicide ang posibleng atubangan sa amahan.
Facebook Comments