Personal nga ginsumiter ni Lailanie Bajado Capada an iya surat ngadto kan CHR8 Regional Director Atty. Desiree Pontejos para han iya pormal nga reklamo kontra ha mga liderato han CPP-NPA-NDF, labi na ha Eastern Visayas Regional Party Committee nga amo an nagrecruit kan Lailani nga magin sundalo han NPA dida han panahon nga menor de edad pa hiya.
Ha interview kan Lailanie, iya gin siring nga usa la hiya ha damo pa nga mga biktima ngan na recruit han NPA ha sayo nga pangidaron salit hustisya an iya gin-aaro.
“Karuyag ko matagan hin hustisya an pag recruit ha akon. Kay kun waray ako ka recruit siguro maupay an akon kabutang yana,” soring ni Lailani.
Ha pagsumat ni Lailanie, 17-anyos la hiya dida han ginkuha ngan ginpabunyog hiya han terorista nga grupo. Hiya in nagtrabaho kumo medical officer, finance officer ngan damo pa pa nga posisyon.
Agosto 6 tuig 2016 dida han ginsulong han sundalo han gobyerno an kampo nira Lailani kun diin didto hiya nakaabat hin kahadlok ngan nagdesisyon nga mag surrender na ha gobyerno dida han tuig 2021.
Mahitungod hine, nananawagan hi Lailanie ha CHR nga mabaton, imbistigaran ngan maaksyunan han buhatan an iya igin-daop nga reklamo.
“Sana mabaton nira an akon ginpasaka nga kaso kay kun dire ine tatagdon damo pa an sugad ha akon nga mari-recruit han kumunista nga grupo. Nadire ako nga mapareho hira ha akon kay ako, nasira ako tungod hine nga grupo,” dugang pa ni Lailanie.
Mababaruan nga an pag recruit ngan pag gamit han mga kabataan o ‘child warriors’ ha mga kasamok o armed-conflict in usa nga pagtalapas han International Humanitarian Law nga lakip ha mga gin-iimbistigaran han opisina han CHR.
