Asawa sakpan sa bana nga dunay lain sa Inn

Davao City – Mag-atubang og kasong adultery ug concubinage ang usa ka asawa human nasakpan sa bana nga adunay kauban nga laing lalaki sulod sa usa ka inn sa may San Pedro ning syudad sa Davao.

Sa report sa San Pedro PNP, gitago sa pangalang si alyas Mar ang asawa nga gireklamo nga taga Brgy Tacunan ning siyudad sa Davao samtang gitago sa alyas Ruel ang lalaking kauban niini, service driver, residenti sa San Isidro, Tagum City kinsa ang duha parehong 31 anyos.

Dugang sa report, gisikop sa kapulisan ang asawa ug kauban niining lalaki sulod sa lodging house human nagpatabang sa otoridad ang bana niini nga si alyas Kevin, 31 anyos nga taga Tacunan.


Matud sa bana nga milakaw ang iyang asawa kagabii ug giingong makigkita sa tag-iya sa yuta nga ibaligya ngadto niya apan dakong kakurat sa bana nga alas 8:50 kagabii, nasundan niya ang asawa nga misulod sa usa ka inn ug didto nakita nga adunay laing lalaki.

Sa karon, ginahusay pa sa kapulisan ang maong panghitabo ug gikatakdang ipasaka ang nasangpit nga kaso karong adlawa.

RadyoMaN Don Pulayao

Facebook Comments