AKLAN — Matapos nga gindaea ni Mayor James Solanoy rong sangka ati sa Ibajay District Hospital kahapon, uman imaw nga nakabaton it tawag halin sa DSWD it Ibajay nga ginpatawagan imaw it doctor nga nag atipan sa ati nga manug-unga nga kinahang-ean raya i-refer sa hospital sa Kalibo.
Dali-dali man nga gin adtunan ni Mayor Solanoy ro pasyente kaibahan eon ro anang driver para nga i-transport raya sa banwa it Kalibo.
Pag-abot sa hospital imaw ginhambaean it doctor nga ro unga sa tiyan it pasyente hay uwa eon naga hueag.
Samtang naga biyahe sanda paadto it Kalibo pag-abot sa may Campo Verde hay nagreklamo ro pasyente nga medyo may naga guwa kana.
Anda nga gintan-aw ag nakita naga guwa eon do ueo ko baby rason nga ginhambaean imaw it driver ko ambulansya nga magtakilid anay para indi magdayon, naghamabae man do asawa it pasyente nga punggan anay, samtang si mayor naghambae nga iiri para gumuwa.
Pag-abot sa may sementeryo it Tangalan, naghambae ro asawa it pasyente nga mana mayor nag guwa eot-a, rason nga ginhambaean imaw ni Mayor nga pakpaka ro anang buli para magtangis ugaling uwa eot-a.
Nag desisyon eon lang si Mayor Solanoy nga isueod sa Tangalan Rural Health Unit ro pasyente para idto eon lang patigayonon ro ibang proseso ag gintatap man nanda.
Sa makaron hay sa mayad mat-a nga kondisyon rong nasambit nga nanay.
Suno kay Mayor Solanoy maabo eon nga beses nana nga gin ubra raya ag daywang beses man imaw nga naka drive it ambulansya nga manug unga rong karga.
