Numancia, Aklan — Nagapadayon makaron rong imbestigasyon it Numancia PNP angot sa natabong pag strafing sa baeay it sangka mangingisda sa Brgy. Navitas, Numancia, Aklan ko dominggo it aga-aga.
Rong biktima hay nakilaea kay Ritchie Tropa, 39-anyos ag residente man it nasambit nga lugar.
Suno kay Punong Barangay Frany Reyes nga nakabati sanda it una ag pangaywang eopok mga ala 1:40 ag dayon ro sunod-sunod nga eopok mga alas 3:00 eon it aga-aga.
Nasayuran nga rong biktima hay una sa anang kwarto naga eobog sa katre tag matabo rong insidente ag mayad nga swerte hay uwa imaw inigo ko mga bala bangud nga tanan ro tama hay idto gid tanan sa anang nahamtangan.
Dugang pa ni PB Reyes nga rayang biktima hay may mga naka mis understanding man sa andang lugar ag tanan nag abot sa anang opisina ag nahahusayan man.
Uwa man sanda it matandaan nga naging grabeng kaaway ko biktima ay mayad man raya nga tawo.
Sa pag imbestiga it Numancia PNP sa lugar hay naka recover it 6 ka mga fired cartridge ag daywa ka mga fired bullet it Calibre 45 nga pistola sa kawarto it biktima ag raya hay igapaidaeom pa sa ballistic examination.
Nagpanawagan man si PB Reyes sa responsable nga naghimo kara nga kon ano ro problema hay mag adto eamang sa mga otoridad ag indi ig paagi sa makara agod mataw an it sabat ag kaayusan.
