Report ni: Jennifer Palomo Debaja
Ginpamatud-an sang isa ka pinay sa HK ang hurubaton “Sa ulihi ang pag hinulsol”.
Anum na katuig sa employer si Marissa sang gulpi ini nga ginterminate bangud napuno na ang amo sa pirmi nga pag pauli sini sang kaagahon tagsa ka day-off, kag kon kaisa nagalab-ot pa Lunes.
Baton naman ni Marissa 48 anyos, may bana kag duwa ka kabataan sang Bulacan nga madamo siya sang sala sa trabaho kag gina intindi lang sang amo, gani wala gid ini naglaum nga gulpi lang i-terminate sang amo sini.
Matawhay man tani ang obra ni Marissa tungod pareho na nga teen ager ang iya mga alaga kon sa diin naga edad sang 11anyos kag 13 anyos. Indi naman sini kinahanglan pa magdul-ong sa eskwelahan tungod ara pirmi ang driver.
Nangin problema ni Marissa ang pagkalulong niya sa tong-its. Tagsa mag day off naka andan na sini magsugal upod ang kaabyanan.
Indi man magnubo sa $1,500 ang ila taya kada domingo rason nga kon sunod sunod ang iya pamierde, naga pangutang ini asta nga nalubong na ini sa kautangan.
Gani daku gid ang iya paghinulsol sang gulpi ini nga ginterminate sang employer.
Apisar nakabaton man ini sang long service kag bayad sa one month notice, kulang man gihapon Ang kwarta para ibayad sa iya kautangan sa sugal.
Gintinguhaan pa kontani ni Marissa nga magpakitluoy sa amo kag nangako nga magbag-o, pero nakadesisyon na ang amo nga pahalinon ini.
Sa karon, naga pangamuyo nalang siya nga makakita sang bag-o nga employer antis paman maubos ang iya 14days nga visa ilabi na nga puro kolehiyo ang iya duwa ka kabataan.
Nagapanugyan si Marissa sa pareho nga OFW nga likawan nga malulong sa bisyo ilabi na ang sugal. Dugang pa sini nga dapat hatagan sang importansiya ang aton obra kag kon mabuot ang inyo amo indi gid pag abusuhan.
