COMELEC XI: Satellite registration gimuntar sa duha ka mall

Davao City – Nanawagan karon ang Commission on Election Davao Region sa mga Dabawenyo nga wala pa makaparehistro nga muadto na sa duha ka dagkong mall sa dakbayan kung asa gimuntar ang duha ka satellite registration alang sa Barangay ug Sangguniang Kabataang election karong buwan sa Oktubre ning kasamtangang tuig.

Sumala ni COMELEC XI Assistant Regional Director Gay Enumerables, ang duha ka satellite registration nahimutang sa SM City Ecoland alang sa mga taga-unang distrito ug sa SM Premier Lanang alang sa mga taga-distrito dos.

Segun ni Atty. Enumerables, nagsugod na og pagdawat ang mga magparehistro ang nasampit nga mga satellite gawas sa Ikaduhang Distrito nga mubalik sa Magsaysay Park karong adlawa ug pagka-adlaw’ng Lunes ug Martes balik na sab sa SM Premier Lanang diin molungtad kini sa Enero 31,2023.

Gitataw sa tigpamaba nga gawas sa adlaw’ng Domingo sarado ang mga satellite registrations sa duha ka mall.

Gipahinumdoman sa opisyal ang mga buot magparehistro nga magdala og bisan unsa nga valid government identification card ug pag-abot sa mga satellite registration gilayon mag-fill-up og application form ug dayon ipasa sa mga personahe sa Comelec aron maproseso ang rehistrasyon.

RadyoMaN Joel Viray