Gibutyag ni CSWDO-Emergency assistance Focal Person Gerlie Amante nga nakahatag na og pasiunang tabang ang ilang buhatan sa mga biktima sa baha gikan sa gibana-banaang 30 ka barangay sa dakbayan.
Suma ni Amante nga ilang gilayon gipalarga ang tulo nila ka Mobile Kitchen aron malutoan og pagkaon aron makakaon ang mga nabahaan nga anaa karon sa mga evacuation centers sa mga nag-unang barangay ning siyudad.
Segun ni Amante nga gawas sa Mobile Kitchen, nagpaabot na sab sila og dugang panginahanglanon sa mga biktima sa baha sama sa tubig, snacks, lugaw, ug uban pang kagamitan gawas sa community cooking nga ginahimo sa mga anaa karon sa mga evacuation centers.
Sa karon, wala una maghatag og pinal nga listahan ang CSWDO kon pila ka pamilya ug indibidwal ang gipanghikling sa ilang mga pinuy-anan kagabii nunot sa pagdako ug pag-awas sa mga kasapaan sama sa Davao river kay nagpadayon pa ang ilang balidasyon.
Gibatbat pa sa focal person nga subay sa Rapid Damage Assessment nga gikasa sa City Disaster Risk Reduction Management Office, ang mga barangay sa tulo ka distrito ang gilampurnas sa baha ug ang labing naapektaran mao ang Barangay nga anaa daplin sa Davao River sama sa Jade Valley sa Barangay Tigatto, Barangay 8, Barangay 9, Barangay 5, Barangay 19 ug uban pang barangay nga dunay mga kasapaan.
Nasayran nga nagsugod ang pagsaka sa level sa tubig sa Davao River ug uban pang kasapaan bandang 10:00 kagabii hatud sa pagbundak sa uwan diin gilayon gimando ang pre-evacuation sa tanang mga residente nga nanimuyo kilid sa kasapaan hinoon walay gikataho nga dunay missing o naangol atol sa paghikling sa mga biktima sa pagbaha.
RadyoMaN Joel Viray
