DepEd-XI: Mandatory face mask sa eskwelahan magpadayon

39
Davao City – Giklaro sa Department of Education (DepEd-XI) nga magpadayon ang implementasyon sa mandatory nga pagsuot og face mask sulod sa mga eskwelahan.

Sa interbyu sa DXDC RMN Davao kang Jenielito Atillo, tigpamaba sa DepEd-XI, gisulti niini nga magpabiling ipatuman ang pagsuot og face mask isip kabahin sa minimum public health standards batok Coronavirus Disease 2019 (COVID-19).

Gipasabot ni Atillo, kinahanglan dili ibutang sa pamasin ang sitwasyon o dili mukumpyansa ilabi na nga dili lang sa eskwelahan makuha ang COVID-19, apan posible usab nga makuha sa gawas.

“Sa pagkakaron, nagpabilin nga anaa sa implementasyon kadtong order nga gipakanaog ni Vice President ug DepEd Secretary Inday Sara Duterte nga ang face mask number one nga requirement sa atong health and safety protocol (batok COVID-19),” saysay ni Atillo.

Una na usab nga gisulti ni Department of Health (DOH) officer-in-charge Ma. Rosario Vergeire ang importansya sa face mask alang sa mga estudyante.

“‘Yung mask na ‘yan doesn’t hurt our children. It protects our children from infections,” matud ni Vergeire atol sa press briefing.



Kahinumduman, gisugyot sa OCTA Research Group ang pagtanggal sa face mask sulod sa eskwelahan tungod adunay dili maayong epekto sa mga estudyante base usab sa health experts.

RadyoMaN Kirby Manzon

Facebook Comments