Davao City – Gisugdan na kagahapong adlawa, Pebrero 5, 2020 ang pag ihaw kun culling sa mga baboy sa Davao Occidental aron makontrola ang outbreak sa African Swine Fever (ASF).
Sa interbyu sa DXDC RMN Davao kang Don Marcelino Mayor Michael Maruya, gibutyag niini nga ubay-ubay na ka mga baboy ang na-ihaw ug nalubong sa mga dagkong bangag aron mahipos ug dili na mukatag pa ang sakit.
“Didto ko sa dump site kay gipangunayan nako didto para mapadako gyud ang bangag, almost 800 na ang gipanghulog didto. Dili ni undangan og dili mahipus tanan,” saysay ni Maruya.
Gibana-banaang anaa sa trese mil ka baboy ang ihawon gikan sa kinse ka mga barangay sa Don Marcelino, Davao Occidental aron dili na mukatag ang ASF.
Dungan sa ginapahigayong depopulation, istrikto usab ang gipatumang lockdown pinaagi sa mga quarantine checkpoints sa Don Marcelino nga gikonsiderang ground zero sa ASF.
RadyoMaN Kirby Manzon
