Kalibo, Aklan — Naghiwat it kampanya rong Department of Health Region 6 sa probinsya it Aklan para sa programa nga “Iwas Paputok” ag pag ingganyo sa mga pumueoyo nga mag gamit it “Torotot” sa selebrasyon it Paskwa ag Bag-ong Dag-on.
Sa nasambit nga awareness program hay gin istoryahan kara ro pila ka mga topiko kapareho it Republic Act 7183 nga kung sa siin ginabwae ro mga paeopok nga sobra sa 0.2 grams nga explosive content nga ginakaeakipan it super lolo,goodbye earth,goodbye universe,bin laden,atomic big nga triangulo ag mga paeopok ag pyrotechnics nga imported.
Nakasaad man sa nasambit nga akta nga pwedeng makulong it 6 nga buean pero indi mageapaw sa sang dag-on rong magabayolar ag may multa nga P 20,000 hasta P 30,000 ag pagkansela it business permit ag pagkompiska it mga baligya.
Samtang pinaagi man sa Memorandum Order # 31 hay ginamanduan rong mga kapulisan ag iba pang ahensya nga istriktong iimplementar do nasambit nga laye para i-regulate rong pagbaligya ag pag gamit ita mga paeopok ag pyrotechnic devices.
Naging presente man sa nasambit nga programa rong mga miyembro it PNP, Bureau of Fire Protection, LGUs, doctor ag pang government ag private organizations nga may daeang torotot.
