National – Ginapanawagan ni Anakpawis Partylist Rep. Ariel Casilao nga iduso na kag pabakuron ang proposed P750 national minimum wage para sa mga trabahador sa pribado nga sektor sa bug-os nga pungsod. Ang nasambit nga panawagan ang kasunod sang pagtaas sang inflation rate sa pungsod nga naglab-ot na sa 6.4% sang nagligad nga bulan sang Agosto. Suno kay Casilao nga ini na ang tama nga panahon sa pagpataas sang sweldo sang mga trabahador agud makalikaw sa nagataas nga presyo sang mga balaklon.
Ginpahayag man sini nga halos indi na mag-igo ang manubo nga sweldo sang mga trabahador sa ila kalagastuhanan sa ila pamilya bangud sa sitwasyon karon nga daw halos ginapatay na sa gutom sang administrasyon ni Presidente Duterte ang mga Pilipino. Sa idalom sang pagpamuno ni Duterte, naglab-ot na sa P15 tubtub P17 per liter ang gintaas sang produktong petrolyo kun sa diin 60 percent sini resulta sang TRAIN 1.
Sa record sang Department of Energy, humalin enero tubtub Agosto, madamo na nga beses nga nagpatuman sang oil price hike ang mga kumpanya sang langis nga isa sa mga ginahalinan sang “price shock” sa mga food products. (Photo from web)
