Pilason ang duha ka estudyante matapos maipit ang ila ginasakyan nga tricycle sang truck nga nagasunod sa ila kag sang van nga ila ginasundan sa Man-it bridge sa siyudad sang Passi mga alas 4:45 kaina sang hapon.
Nabali ang natuo nga batiis sang isa sa mga biktima nga si Cristine Mae Parrenio, grade 7 sang Man-it Integrated School samtang si Nikki Ann Lava, grade 8 student sang amo man nga eskuwelahan ang nakaangkon sang mga hanog kag nagbatyag sang palanakit sang dughan kag lunsay ginpangdala sa western Visayas Medical Center.
Ginpahayag ni Police Styaff Sgt. Ruel Dave Navarro, traffic investigator, nga nagasakay sa tricycle ang duha ka estudyante sang ginbungguan sang truck nga may karga nga mga tubo nga ginamaneho ni Garry Galeno matapos mawad-an ini sang preno kag nakabunggo man ang tricycle sa ginasundan sini nga foton van nga ginamaneho ni Denmark Cagayan..
Sa karon yara na sa custody sang Passi City Police station si Galeno apang posible ini makaguwa sa tion matapos ang reglamentary period bangud wala man sang plano nga magpasaka sang kaso ang pamilya sang mga biktima.
Handa naman nga sabton sang tag-iya sang truck ang pagpabulong sang mga biktima.
