Kalibo, Aklan – Gindayaw it Belgian Embassy rong desisyon it Duterte Administration nga na-rehabilitate rong isla it Boracay.
Ginpahayag ni Belgian Ambassador to Manila Michel Goffin, rong paglimpyo it Boracay hay good decision nga ginhimo it Pangueong Rodrigo Duterte.
Gindayaw man ni Ambassador Goffin, ro planong rehabilitasyon it gobyerno sa iba pang kilaeang tourist destination sa Pilipinas, kaeakip eon ro El Nido sa Palawan.
Ginhambae pa it diplomat, rong Pilipinas hay napakanaming nasyon, bukon eamang it Boracay ag El Nido kundi ro iba pang lugar, rason nga nagakadapat eamang nga bueoligang imentina rong kalimpyo.
Suno pa kay Goffin, rong rehabilitasyon it isla hay sangka tikang paadto sa sustainable tourism o ratong turismo nga may positibong epekto sa palibot ag ekonomiya it isla.
Kunga matandaan, rong Boracay Island nga ginakabig “island paradise” hay ginsarado sa sueod it an-um nga buean umpisa Abril 26 hasta Oktubre 26 matapos ginmando ni Pangueong Rodrigo Duterte para taw-an it daean rong paglimpyo ag rehabilitasyon sa isla.
Gintawag ni Duterte rong Boracay bilang “cesspool” tuga it polusyon, overcrowded sa mga turista, tambak nga basura, mga iligal nga mga imprastraktura ag iba pang isyu angot sa palibot.
