Inihain ni Navotas Representative Toby Tiangco ang House Resolution (HR) 808 na humihiling sa liderato ng Kamara na i-convene ang Committee of the Whole para alamin ang estado ng arrest warrant laban kay dating Congressman Zaldy Co.
Palaisipan kay Tiangco kung hinahanap ba talaga si Co dahil tila walang sense of urgency na hanapin at panagutin ito sa pagkakasangkot sa korapsyon sa budget insertions at flood control scandal.
Layunin din ng imbestigasyon na mailatag ang nararapat na mga hakbang para mabilis na madakip ang mga nahaharap sa warrant of arrest, lalo na kung ito ay nasa ibang bansa.
Ayon kay Tiangco, dapat ding malinaw na matukoy kung anong ahensya ang may pangunahing responsibilidad na ipatupad ang arrest warrant, pati ang koordinasyon sa foreign jurisdictions at engagement sa international law-enforcement agencies.
Kabilang sa mga nais ni Tiangco na ipatawag sa pagdinig ang mga opisyal ng Department of Justice (DOJ), National Bureau of Investigation (NBI), Bureau of Immigration (BI), Ambassador of Portugal to the Philippines, at ang mga kalihim ng Department of Interior and Local Government (DILG) at Department of Foreign Affairs (DFA).
