General Santos City—Samdan ang biktimang si Jade Panes Vasquez, 21, residenti sa Soriano Subd., Barangay Lagao, Gensan human nga napusilan sa iyang nakaaway sa kalsada ala 1:20 ang takna sa kaadlawom, atubangan sa usa ka establishemento sa may Lagao Round ball.
Sa inisyal nga imbistigasyon sa Police Station 3 ngadto sa biktima nasayran nga sakay kini sa iyang motorsiklo uban ang iyang amigo sa may National Highway nga sakop sa NLSA road.
Pag-abot sa may Round ball, sa barangay Lagao, hapit nagbangga ang motorsiklo sa biktima ug sa suspek, tungod niini mibusina ug kusog ang biktima nga gikasuko sa suspetsado.
Gisundan niini ang biktima ug pag-abot atubangan sa usa ka establishemento, naglalis ang mga nahisgutan. Didto na mibunlot ug pusil ang suspek ug gipusil ang biktima dayon paspas nga misibat.
Ang biktima nakahimo pag dangop sa buhatan sa Police Station 3 aron i-report ang nahitabo kaniya luyo paman nga siya samdan sa iyang duha ka tiil.
Gilayon man usab nga gidala sa mga personahe sa Police Station 3 ang biktima sa Dr. Jorge Royeca Hospital aron nga mapailawom sa medikasyon.
Sa karon ginaila pa sa kapulisan ang identity sa nakabingkil sa biktima nga nipusil kaniya.
