Gin-aku sang suspek nga si June Aguilar ang brutal nga pagpatay sa Grade 3 teacher sang Gemumua- Agahon nga si Ma. Corazon Tionson matapos nga natigayon ini nga madakpan sang mga Brgy. Official sang Brgy. Agtabo, Passi City pasado alas- 7 kaina sang aga.
Suno kay Aguilar nga una nalabayan niya ang biktima nga nagatampi matapos nga nagpanibin sa sulod sang CR sang balay.
Sang nagsulod ang biktima, ginsunod niya ini tubtob sa salas sa diin didtu sila nagdumugay. Sang nagbato ang biktima, ginsulok-sulok niya ini rason nga nag-uy oy sang magpalangluya.
Ginpahayag man sini nga gindala niya sa kuarto ang biktima kag ginhimuslan.
Bangud sang pagka-impito suno kay Aguilar matapos niya ini nga himuslan, ginbuno niya sang makaduha ka beses ang biktima sa likod kag ginlampusan sang martilyo sang tatlo ka beses sa ulo nga nangin rasun sang kamatayun sini.
Bag-o maghalin sa lugar ginhigtan pa sini ang kamot kag ginbusalan ang baba sang biktima.
Ginpanginwala sang suspek nga ginkawat niya ang kuarta kag mga gamit sang biktima sa pihak sang pagkarekober sang mga otoridad sang kulintas nga may pendant nga butterfly sa sulod sang iya bag sa ila balay nga ginapanag-iyahan naman sang biktima.
Gin-ako man ni Aguilar nga naka-inom siya bag-o niya ginhimo ang kremin apang ginpanginwala naman sini nga nakadruga siya sadtu.
Natigayon nga madakpan ang suspek sang mga Brgy. Offiicial sang Brgy. Agtabo, sa syudad sang Passi matapos nga nagdulhog ini halin sa nabukid nga bahin sang barangay para sa pagbakal kontani sang sigarilyo apang nagduda ang mga residenti bangud wala ini makatultol sang tiangge sa lugar.
Gina-preparar na sang kapulisan ang kaso nga ipasaka sa suspek bangud sa brutal nga pagpatay sa biktima sang nagligad nga semana.
Nahibalu-an nga nasapwan ang bangkay sang biktima sang nagligad nga adlaw sang lunes Hunyo 15, 2018 sa sulod sang iya balay sa Brgy. Gemumua- Agahon sang labandera sini nga wala na sang kabuhi sa sulod sang iya balay pasado alas- 10 sang aga.
