Sakit na kamatayon an nahiaguman nan isa ka 19 anyos na laborer sa did on na ini aksidente nadasmagan sa isa ka forklift na ekipo na tagmaneho sa ija ra isab tiyo o uncle.
Waya mabantayi nan uncle an ija pag-umangkon na naigo na baja ini nan ija tagmaneho na forklift suyod sa isa ka-warehouse na ila rasab tagtrabahoan, sa dayan Borromeo, Barangay Taft, Surigao City,Huwebes sa hapon (December 7, 2017).
An biktima tagkilay an na si Jay-ar Semorlan, 19-anyos,residente nan Purok-6, Barangay Mabua, Surigao City, na isa ka kargador nan warehouse; kun diin kaiban nija sa trabaho an ija uncle o tiyo na amoy nakadasmag,na si Ritchel Dela Cruz, 39-anyos, forklift operator,minyo,sanan silingan ra usab sa biktima. An biktima an gidali pa pagdaya sa ospital pero gideklara na ini nan doktor na ‘dead-on-arrival’. Sumaya pa sa tagbutyag sa RMN Surigao nan uncle sa biktima na amoy nakadisgrasya ,na an ija pag-umangkon an nagdako sa ija, sanan waya nija matujo an pagkadasmag nan ini kay ya sija mahibayo na didto ini nag standby sa did-on na cja nagmaniobra sa amo na ekipo. Hinuon nagkasinabot na sila sa mga ginikanan sa biktima na dili na mupasaka pa nan kaso kontra sa ija. An tag-ija sa warehouse kun diin nahitabo an insidente an miangkon sa tanan mga gastuson sa pagpalubong sa biktima.(RadyoMaN Jerson Fuentes)
