Giingong pagpalit og signature campaign sa mga purok leaders miabot na sa IPMR sa konseho

Davao City – Miabot na sa konseho sa syudad sa Davao, partikular na sa buhatan ni Indigenous People Mandatory Representative Rodolfo Mande, ang giingong pagpamalit og signature sa mga Purok Leader sa mga Barangay sa Distrito sa Marilog, syudad sa Davao.

Kini ang gikonpirma mismo ni Councilor Mande, human nahinabi sa DXDC RMN Davao News Team pinaagi sa telepono sa miaging adlaw.

Gibutyag ni Mande, sukad pa sa nakalabay’ng semana ang pinalitay og signature sa mga purok leaders sa Marilog District.

Personal nga miadto si Mande sa Marilog Proper aron sutaon ang naasoy nga aktibidad ug wala masayop ang representante sa mga tribu sa konseho, aduna gayod diay natigayon nga pagbayad sa signature sa mga purok leaders, isip bugti sa pagpabor sa Charter Change o Cha-cha pinaagi sa people’s initiative campaign, kini base sa mga ebidinsya nga nahipus gikan sa mga tawong nagpakalat sa mga papel sa signature.

Adunay pagduda si Mande nga usa ka Partylist Representative, maoy naglusad sa signature campaign, apan nagdumili na ang opisyal sa pagngalan niini.

Hinoon, gitin-aw niini nga wala pay mga kapitan sa ikatulong distrito sa syudad, ang nagpaabot og reklamo sa iyang buhatan kabahin sa Signature Campaign.

RadyoMaN Joel Viray