General Santos City—Nagpagawas na ug pahimangno ngadto sa iyang mga sakop si Police Chief Inspector BEnjie Ancheta, Hepe sa Alabel Municipal Police Station batok gikaingong Sparrow Unit nga gitahasan sa New People’s Army nga manglikida ug mga sakop sa Militer ug kapulisan sa rehiyon.
Sumala ni PCI Ancheta nga bisan siya nakadawat usab ug impormasyon nga dunay gipadalang Sparrow Unit ang NPA aron mupatay sa mga sakop sa pulis ug militar human nga pakyas nga mapadayon ang una nang giplanong hisgutanang pagkalinaw tali sa CPP-NPA-NDF.
Tungod niini iyang gipaamping ang iyang mga sakop aron nga dili mabiktima ug dili maisahan sa maong grupo. Giawhag usab ni PCI Benjie Anchita ang iyang mga sakop nga likayan ang paglakaw nga nag inusara lang hilabi na kung nakauniporme.
Mas maayo usab nga kung dunay lakaw, dili nalang musul-ob ug uniform aron nga dili masundan og mapusilan sa gikaingong sparrow unit.
Nasayran nga usa ka pulis usab nga nakabase sa Surallah PNP ang gipatay samtang nakamotorsiklo ug nakafull uniform kansa gidudahang suspek niini ang mga miyembro sa sparrow unit sa NPA.
