Kalibo, Aklan – Magiging available eon sa mga kabarangayan sa probinsya it Aklan rong HIV Screening.
Sun okay Mr. Jay Lorenz Dionisio it Provincial Health Office (PHO) Aklan nga sa maabot nga World Aids Day sa Disyembre 1, 2019, ro Aklan Provincial AIDS Council hay naga plano nga ubrahong haum, available ag accessible sa kumonidad. Raya hay paagi sa HIV community-based screening ukon CBS.
Samtang rong AIDS Council pinaagi sa Provincial Health Office (PHO) hay magapatigayon man it CBS training para sa mga LGUs sa Nobyembre 13 hasta 15 para may anda nga tagsa-tagsa ka mga trained nga staff ukon volunteer para nga magpatigayon it HIV screening services sa mga kabarangayan.
Raya hay igapatigayon kung mga taga DOH Regional Office 6 ag kung Provincial Health Office Aklan.
Sa implementasyon kara hugot nga observed rong nagakaigo nga referral ag rong hugot nga pagtao it privacy ag confidentiality it kleyente.
Pinaagi sa rayang CBS hay ginahandum it probinsya nga sa mas temprano hay masayuran eagi ro mga may HIV infections ag matabangan para nga indi eon raya maglala ukon maging AIDS.
Samtang sa pihak nga parte, umpisa Enero 1986 hasta it Hunyo 2019 hay may 229 eon ka mga kaso it HIV/AIDS rong na record sa probinsya it Aklan.
Sa nasambit nga numero hay 94% ro mga kaeaeakin-an ag 6% ro mga kababayen-an kung sa siin rong eaban kara hay nagapang edaron it 15-anyos hasta 34-anyos.
Ro may mataas man nga transmission sa klase it pakikipaghilawas hay rong “men having sex with men” nga ginatawag.
Ro banwa it Kalibo ro nagapanguna nay may 69; Malay – 43; Ibajay – 15; Banga – 13; Nabas – 12; Tangalan – 9; Batan, Malinao, Numancia ag Altavas nga may tig 8; Balete – 7; Lezo ag Makato nga mag tig 6; New Washington – 5; Buruang ag Libacao nga may tig 4; Madalag – 2 ag may Unknown nga 1.
