Gin-abduct sang duha ka armado nga kalalakin-an ang isa ka dalaga samtang yara sa ila puluy-an sa Sitio casamata, Barangay Central, Ajuy, sini lamang nga gab-i.
Ginkilala ang biktima nga si Remelyn Era, 22 anyos sang nasambit nga lugar.
Ginpahayag ni Police Chief Inspector Charlie Sustento, hepe sang Ajuy PNP nga natabu ang insidente mga alas 7:50 sini nga gab-i samtang nagalantaw sang TV ang biktima upod sa iya ginikanan kag kauturan sang magsulod ang duha ka armado nga kalalakin-an kag gintayaan sila sang armalite.
Ginpilit sang mga suspek nga dal-on ang biktima kag ginhambalan ang pamilya sini nga magkooperar lang agud wala sang malain nga matabu sa ila bangud “bayad” na ang dalaga.
sa karon, nagapadayon ang pagpangita sang kapulisan sa biktima.
Suno kay Sustento nga sa karon may person of interest na sila nga amo ang responsable sang pagpa-abduct sa biktima matapos makuhaan sang pahayag ang pamilya sini.
Nahibaluan base sa pahayag sang pamilya, may naka-relasypn nga negosyante ang biktima kon sa diin natukiban ini sang asawa sang iya ka-relasyon kag amo ini ang ginalantaw nga motibo sa insidente . (sspunay)
