Hayan magpadala na ug imbestigador ang Malacañang didto sa dakbayan sa Dapitan human nadawat na sa buhatan ni Presidente Rodrigo Roa Duterte ang sulat-reklamo nga gipadangat sa mga katawhan sa Isla Selinog, sakop sa dakbayan sa Dapitan, pinaagi sa mga barangay officials ug uban pang mga lumulopyo niini, kabahin na sa gika-alegar nga “land-grabbing” nga gihimo ni Romeo “Nonong” Jalosjos ngadto sa usa ka Amado A. Balucan.
Sa iyang reklamo, gisugilon sa 66 anyos nga si Balucan nga siya kauban sa iyang mga igsuon lumad nga lumulopyo sa Isla Selinog sukad pa sa ilang apohan nga si Demetio Aguaren ug inahan nga si Zosima Aguaren Balucan. Gani silang siyam (9) ka managsuon ang didto na natawo gikan pa sa ilang kinamagulangan nga natawo niadto pang 1942. Matud pa nga sila ang mga sumusunod sa yuta ni Demetrio Aguaren.
Gisaysay ni Balucan nga usa ka higayon giduol siya ni Romeo “Nonong” Jalojos aron paliton ang ilang yuta sa kantidad nga Dos Milyones ka Pesos (Php 2,000,000.00). Matud pa ni Balucan nga mibalibad siya ug ang iyang mga igsuon tungod kay wala silay laing yutang kapuy-an. Dugang pa niini nga tungod sa iyang pagbalibad, si Nonong Jalosjos miingon kaniya nga “Sugod karon kaaway na ta.”
Si Balucan mihulagway kon gi-unsa sila pagpahawa sa ilang yutang gipuy-an gamit sa mga police ug private army nga adunay tag-as nga armas. Matud pa nga gi sirad-an, gi padlockan ug gibutangan ug karatula nga “Private Property” ug “No Trespassing” ang ilang yuta. Ug tungod sa ilang kahadlok, napugos kini paghawa sa ilang tagsa-tagsa ka panimalay.
Midugang pa si Balucan nga sa ilang nasayran, dili lang sila ang gi-ilugan ug yuta ni Jalosjos. Sumala pa nga daghan na ang nabiktima apan walay nakatindog ug mibarog kay lagi mahadlok sa ilang (Jalosjos) gahum.
Si Amado Balucan naghangyo kang Presidente Duterte nga tabangan nga makabalik na ang ilang pamilya sa ilang tagsa-tagsa ka mga pinuy-anan aron sila makapadayon sa ilang malinawon ug hapsay nga pamuyo sa ilang lugar natawhan.
Gipanghinaut usab niya nga wala nay lain pa kanilang mga pobre ug uyamot ang mabiktima sa pag panamastamas ug pag-abuso gamit ang gahum ug kwarta.
Gipadangat ni Balucan ang ilang pagsalig kang Presidente Duterte nga makab-ot nila ang hustisya tungod kay kini man ang nagsulong sa katungod sa mga kabus ug dinaog-daog.//
