Banga, Aklan — Umako pina agi sa judicial confession si Kenny Natabio, 29-anyos residente it Pagsanghan, Banga nga imaw mismo ro nakapatay sa anang dugalingon nga manghod nga si Lina Natabio, 14-anyos ku nagtaliwan nga Mayo 4 it gabie.
Sa interview it RMN DYKR kay PSMSGT. Philialyn Navarra, ginpahayag kara nga personal nga nagdangop sa Banga PNP ro suspek ku Mayo 10 ag nag aku sa nasambit nga krimen.
Base sa confession it suspek nga samtang nagapauli sanda sa andang baeay hay nagkaangkon sanda it mainitan nga diskusyon kung sa siin nakasambit it maeain nga kataga si Lina nga ginkaakig it suspek.
Sa intensyon nga paeagon eamang ro biktima nagbuoe raya it butong sa daean ag binunae ro biktima samtang nagatalikod apang raya hay naabot ag inigo sa anang ueo.
Bangud sa pag-usig it anang konsensiya kabangdanan nga raya hay nag-aku sa ginhimo nga krimen.
Natigayon nga ginbaton it piskalya ro kasong Homicide kay Kenny ku Mayo 14, 2019 kung sa siin bangud naging regular filing ro pagpasaka it reklamo, temporaryo raya nga ginpahilway.
Gindugang pa ni PSMSGT. Navarra nga mabaskog ro andang lead sa kasagsagan it imbestigasyon kung sa siin si Kenny ro naging sentro it andang pag usisa.
Makabig raya nga hangkat para sa pamilya Natabio ro naging development sa kaso kung sa siin parehong magmaeanghod eamang ro imbolbado sa maduguon nga insidente.
Nasayuran nga dati man nga nakulong si Kenny Natabio sa kaso man nga homicide nga anang nakumiter ku 2011 sa banwa it Banga.
