LGU-Davao gi-ban ang poultry products gikan Luzon ug bird flu-affected areas

Davao City – Nagpatuman karon ang City Government of Davao og temporary ban sa poultry partikular na kadtong gikan Luzon ug uban pang lugar nga apektado sa Highly Pathogenic Avian Influenza (HPAI) H5N1 strain o mas nailang Bird Flu.

Subay sa Executive Order (EO) No. 19 sa Local Government Unit (LGU) Davao nga gipagula kagahapong adlawa (Mayo 19, 2022), lakip sa gidid-an nga makasulod ang poultry ug by products ingon man ang piso, itlog, semilya, hugaw, ug balahibo sa poultry gikan sa nahisgutang lugar.

Sa direktiba, ang mga magbiyahe og manok igtatari, pato, kalapati, ug captured wild birds kinahanglang mag-secure og veterinary health certificate diin nakabutang nga kini naggikan sa lugar nga walay natalang bird flu.

Sa EO, gitugot ang pag-transport o movement sa manok igtatari gikan sa Davao padulong sa laing probinsya, apan gidili ang movement niini pabalik sa dakbayan gawas lang kung adunay mapakitang negative Avian Influenza test result gikan sa area of origin niini.

Sa pinakaulahing report sa Davao City Veterinarian’s Office (CVO), nagpabiling zero case sa bird flu ang syudad sa Davao.

RadyoMaN Kirby Manzon