Kalibo, Aklan — Uman nga ginserbehan it warrant of arrest si Ma. Evelyn Graces Orille kainang agahon sa Aklan Rehabilitation Center (ARC).
Si Evelyn hay 34-anyos ag taga B16 LA 1, Phase 2 Canyon Ranch, Brgy. Lantic, Carmona Cavite.
Kon matandaan imaw ro asawa it sambilog sa mga meyembro it acetylene gang nga si Glenn Alvin Orille nga nadakpan man it mga kapulisan ko Enero matapos masayuran nga sanda man ro responsable sa serye it paeanakawan sa mga apartments iya sa Kalibo.
Pinaagi sa gintingub nga pwersa it Aklan PPO Trackers Team, Kalibo PNP, PGPH, CIDG-Aklan, Aklan FMC gin aresto si Orille pinaagi sa bisa kung warrant of arrest.
Alas 10:00 it agahon kaina, una nga ginserbe rong warrant nga may criminal case # 14320 nga may pyansang P 10,000 ag may petsang Agosto 3, 2018 ag criminal case # 14424 nga piyansang P 20,000 ag may petsang Setyembre 13, 2018 tanan gin issue Hon. Judge Bienvenido P. Barrios Jr. it RTC 6, Judicial Region, Branch 3 Kalibo, Aklan.
Mga alas 12:34 uman eoman imaw nga gin serbihan it warrant of arrest nga may criminal case # 1431-A nga may petsang Hulyo 31, 2018 ag may piyansang P12,000; criminal case # 1444-A nga may petsang Agosto 15, 2018 ag may piyansang P6,000; ag criminal case # 145-A nga may petsang Agosto 15, 2018 ag may piyansang P10,000 nga gin issue ni Hon. Judge Alicia A. Cruz-Barrios, Presiding Judge, Municipal Trial Court, Kalibo, Aklan.
Si Evelyn hay gin aresto samtang naga bisita sa anang asawa sa ARC sa Nalook.
Temporaryo anay imaw nga gin kustodiya it Kalibo PNP ag igaturn over sa korteng natungdan.
