Kalibo, Aklan — Sambilog rong habun-an matapos nga mag ilinaway rong magmaeanghod kaina it agahon sa Purok 3, Brgy. Tinigao, Kalibo, Aklan.
Rong biktima nakilaea kay Jomar dela Cruz, sa legal nga edad ag nakaangkon it eapos nga tama sa waeang butkon ag naabot pa rong kilid.
Samtang ro mga ginaturong suspek hay sanday Johnbert dela Cruz, 19-anyos ag Jay R dela Cruz, 34-anyos tanan residente it nasambit nga lugar.
Ginasugid nga unang nag aeayatan it punite pero haadto sa pagpamuno.
Suno kay Jay R nga nag-uli sa anda rayang si Johnbert ag naghambae nga bun-on na si Jomar dayon pumanaw may daeang siyaw-duko nga nakaputos it kurtina.
Sumunod man si Jay R kay Johnbert ag pag-abot sa lugar it insidente hay nakita na eon lang nga binuno ni Johnbert si Jomar.
Insigida nga gindaea sa hospital si Jomar samtang rayang si Jay R hay gin-aresto it kapulisan pero si Johnbert hay nagapabilin nga at-large.
Naninahan man sa alima rong Chief Tanod nga si Manny dela Cruz matapos nga mag responde sa lugar ag gintinguha nga mabuoe rong siyaw.
Ginapanan-aw kara nga rason hay rong aligotgot ni Johnbert kay Jomar bangud nga ko nagtaliwan nga sabado it gabii hay nag-adto si Jomar sa baeay nanday tatay nanda nga una man si Johnbert ag nagwala, ginpangwasak ro kagamitan sa sueod it baeay.
Uwa rato pagsapaka ni John bert ag ni tatay na kundi nagpanaog lang sanda ag nagpaliwa-liwa.
Nasayuran pa gid nga ko nagtaliwan nga adlaw hay nag adto man rayang si Jomar sa may baeay ni Jay R ag nagsininggit kon sin o ro maisog, ugaling sa oras ngato hay uwa si Jay R sa andang baeay kundi ro anang asawa ag nabati-an naman.
Sa makaron hay padayon nga ginabueong sa Aklan Prvincial Hospital si Jomar, detained sa lock up cell it Kalibo MPS si Jay R ag gina usoy mat-a it kapulisan si Johnbert.
